Ministè Defans Grann Bretay rapòte vandredi se sèlman 17 chef deta afriken ki prezan nan reyinyon an. 43 lidè afriken te prezan nan dènye konferans la. Dapre ministè a, blokis ke Moskou mete sou sereyal Ikrèn nan pa sèlman lakoz pri sereyal moute, men tou pwal fè ensekirite alimantè blayi sou tout kontinan afriken an "pandan 2 lane pou pi piti. "
Sanble ke Prigozhin, lidè Gwoup Wagner a ki te moute yon rebelyon san siksè nan LaRisi nan mwa Jen pase a, te prezan. Chèn televizyon BBC rapòte apre anpil analiz sou òdinatè, ke li wè nan Konferans la foto Prigozhin, ak Freddy Mapoul ki se gwo chabrak nan Repiblik Santr Afrik.
Yon lòt kote, sòlda nan Ikrèn repran vilaj Staromaiorske nan men fòs ris yo, se sa Prezidan Volodymyr Zelenskyy moutre nan yon video ki parèt jedi, pandan Ikrèn ap kontinye kont-ofansiv li a pou pouse antre nan sidès la ki anba kontwòl LaRisi.
