Vedet foutbol Ajanten Leo Messi resevwa yon akèy chalere e memorab antanke nouvo jwè ekip foutbol Inter Miami. Misye se jwè ki gen plis renome a. Match la te dewoule nan stad ekip la nan Fort Lauderdale, yon jou sèlman apre li te siyen kontra li ak ekip la ki pral dire jiska ane 2025.
Messi te souriyan e li di li kontan rejwenn ekip la.
"Verite a se ke mwen kontan a mo, mwen trè kontan viv Miami ak nou. Mwen vle komanse jwe epi genyen match."
Responsab ekip la yo, pami yo ko PDG ak ansyen vedèt foutbol Britanik David Beckham te sou plas pou "devwalman" Messi a. 20 mil fanatik te reponn prezan. Pi fo pami yo sete moun Ajantin ak lot peyi Amerik Latin yo ki dekri arive li nan Miami tankou yon rèv reyalize.
Fanatik Gustavo Viyordo:
"Mwen kontan anpil anpil. Mwen kriye lè mwen wèl ak je pa m. Li se meyè jwè a e lè ou gen chans wè li se yon bagay mwen paka dekri tèlman mwen kontan."
Devan stad la, fanatik yo te selebre. Kèk pami konpatriyot Ajanten Messi yo te deguste yon bon "asado" kidonk barbecue - tankou si yo te Buenos Er.
Fanatik Hernan Reyes:
"Fok ou jwi ak fanmi, zanmi. Mwen patka rate evenman sa a. Gade sa Messi fè. Li rasanble fanmi e li bay Ajanten yo kè kontan."
Gen lot kite konsidere l tankou yon opotinite pou tire pwofi sou Messi.
Sandra Sanchez se yon machann machandiz Messi:
"Mwen gen anpil mayo ak kepi. M espere vann anpil."
Foli Messi finn anvayi rejyon sid Florid depi apre Inter Miami te anonse foutbole anpil moun konsidere tankou meye nan mond lan tap vin viv Ozetazini pou rejwenn ekip la.
Gen nouvo gwo koken chen miray ki gen imaj Messi ke atis penn sou li, ki finn tounen atraksyon touristik nan katye tankou Wynwood, Miami.
Yon lot miray Messi nan Miami ke atis Venezyelyen Arlex Campos penn atire anpil atansyon.
Atis Arlex Campos:
"Se yon bagay fou. Moun pran plis pase 1,500 foto miray la chak jou. Pwojè sa a te bèl anpil epi enpotan paske nou penn Messi ak mayo Inter la."
Messi deja komanse antrene ak nouvo ekip li, ki okipe dènye plas la nan konferans ès la. Men fanatik yo espere Messi pral chanje sa.
Pou Antoni Belchi ak Jose Pernalete nan Miami, mwen se Sandra Lemaire
