Pri pou lotri popilè Ameriken ki rele Powerball la ogmante ankò semèn sa a pou l rive yon afè $1 milya apre okenn moun pat gen nimewo ki soti nan tiraj la.
Chif ki te soti nan tiraj Lendi a sete: 5, 8, 9, 17, 41 epi powerball la - ki se yon boul wouj - sete 21.
Otorite yo estime gwo lo pou tiraj Mèkredi a se pral 7èm pi gwo lo nan listwa peyi Etazini e 3em pi gwo sòm yo konstate nan istwa lotri Powerball la.
Moun ki achte biyè pou lotri sa ap gen chans pou yo swa ranpote $1 milya dola ke yo va peye yo ti kras pa ti kras chak ane, swa aksepte yon montan yon sèl kou ki se apepre $516.8 milyon dola apre yo finn wetire lajan enpo a ladann.
Dènye fwa yon moun te ranpòte gwo lo Powerball la sete 19 Avril, lè pri a te $253 milyon.
Depi lè a okenn moun poko ranpòte pri a apre 38 tiraj ki fèt yo.
