Reyinyon an pwal fèt nan kapital Lituani an Vilnius, nan sèlman 35 kilomèt distans ak fwontyè nouvo baz Prigozhin nan, sa ki ogmante ijans pou ranfòse pati lès alyans la epi ogmante depans nan defans.
Li pa klè toujou konbe manm lame mèsenè Prigozhin nan ki pwal akonpaye l nan Belaris, men lide ke yo ka moute kan yo sèlman nan kèk èd-tan distans la, sa mete tansyon nan Lituani ak Letoni kòm peyi Balt, e nan Polòy. Yo tout pataje yon fwontyè ak Belaris.
Lituani ak Letoni prese mande manm l-OTAN yo pou ranfòse defans yo, kote yo moutre ak ki vitès fòs Wagner yo te mache sou Moskou.
Efò pou ranfòsman yo tanmen touswit. Lendi, Almay te anonse li pwal estasyone an pèmanans yon bligad militè 4-mil sòlda nan Lituani, yon bagay Vilnius te reklame depi koumansman envazyon LaRisi nan Ikrèn nan. Jiska rebelyon Wagner a, Bèlen te sèlman vle deplwaye twoup li nan Lituani tanporèman.
Madi, Sekretè-Jeneral l-OTAN Jens Stoltenberg te di li twò bonè pou di ki sa prezans Wagner ka reprezante pou alyans la, men li sèmante ke l-OTAN ap pwoteje “chak alye, chak pous teritwa l-OTAN” kont menas ki ta soti nan “Moskou oswa nan Minsk.”
