Ministè Sante Soudan an di gen plis pase 500 moun ki pèdi lavi yo ak preske 5-mil lòt ki blese depi batay te pete nan peyi a 15 Avril pase ant 2 lidè ki ap goumen pou pouvwa, an palan fòs gouvènman Soudan an ak gwoup paramilitè Fòs Sipò Rapid yo.
Ajans l-ONU ki se Òganizasyon Entènasyonal Migrasyon fè konnen semèn sa a 334-mil moun pou pi piti kite kay yo akoz batay yo men rete nan peyi a, anplis de 100-mil lòt ki kouri kite peyi a. Ajans la avèti ke goumen an ka lakoz plis pase 800-mil moun kouri peyi sa a ki nan nòdès Afrik la.
Anpil moun ap jete yo nan peyi ki gen fwontyè ak Soudan, tankou Tchad, Soudan Sid, Repiblik Sant-Afrik, Ejip ak Etyopi.
