Gouvènè eta Florid Ron DeSantis voye 2 avyon chaje ak migran nan Martha's Vineyard, yon zile ki sitye sou kòt eta Massachusetts kote boujwa Ameriken yo renmen al pase vakans.
Taktik sila a se youn ke gouvènè Repibliken yo ap anplwaye pou atire atansyon sou sa yo konsidere tankou echèk politik fwontyè administrasyon Biden nan.
Biwo DeSantis di vol li voye nan zile a se yon jefò pou "transpòte imigran ilegal yo nan destinasyon sanktyè".
Biwo gouvènè a pa bay detay sou stati legal moun sa yo, men anpil migran ki travèse fwontyè Meksik ilegalman gen pwoteksyon pwovizwa pou yo pa depòte yo pandan yap mande azil nan tribinal imigrasyon Ozetazini. Se yon bagay ke lwa peyi Etazini ak trete entènasyonal yo ba yo pèmisyon pou fè.
Gen lòt se moun yo te mete nan prizon ann atandan depòtasyon yo, men ke yo lage sou pawòl pou rezon imanitè.
