Dapre Alyans Sivik pou Jistis ak Demokrasi (ACJD), yon tribinal nan Managua te kondane Yubrank Suazo a 5 ane pou "konplo kont entegrite nasyonal la" ak yon lòt 5 an paske li "gaye fo nouvel".
Suazo, 31 an, se moun vil Masaya ki sitiye nan sid peyi a. Se la pi fò manifestasyon anti-gouvènman yo te fèt nan ane 2018.
ACJD ki se yon youn nan gwoup opozisyon yo estime ke lajitis te "pouswiv e kondane Suazo san li pa te komèt okenn krim, ni pat genyen okenn lyen ant limenm ak estrikti kriminèl yo".
Apre yon medyasyon Legliz Katolik te fè, otorite yo te lage Suazo an 2019 apre gouvènman an te akòde padon bay plizyè santèn opozan ki te patisipe nan manifestasyon yo.
Nan mwa me, yo te arete l ankò e fwa sa yo te mennen l devan jistis.
Suazo se youn nan 190 opozan ki nan prizon nan Nikaragwa, dapre òganizasyon dwa moun yo.
Ortega te akize opozan ki nan prizon yo "pou finansman oswa chèche resous ak sipò Yankee" pou te destabilize peyi a nan ane 2018.
