Minis Afè Etranjè ris la pibliye yon deklarasyon kote li di moun sa yo ap "gaye fo nouvèl" sou konfli a nan Ikrèn e yo "pa gen dwa antre sou tèritwa Federasyon Ris la ankò."
Non plizyè gwo ofisyèl BBC ak jounalis popilè twouve yo sou lis sa a ke Ris yo pibliye - pami yo gen Orla Guerin, Paul Adams ak Nick Robinson.
Genyen tou kèk lòt gwo non nan près britanik la, tankou Katharine Viner, editè jounal The Guardian, Gideon Rachman, kwonikè Financial Times, ak Sophy Ridge, ki prezante emisyon politik chak dimanch sou Sky News.
Kèk lòt moun ki gen renome pou konesans yo nan dosye ki gen rapò avèk Larisi ak ansyen Inyon Sovyetik la, tonbe tou anba menm entèdiksyon an, tankou jounalis Shaun Walker (The Guardian) ak analis Mark Galeotti.
Anplis 29 jounalis ak ekspè ki sou lis moun Moskou vize ak entèdiksyon sa a, gen tou 20 sitwayen britanik ki asosye ak sektè defans la.
Se pa premye fwa Larisi anonse yon dispozisyon konsa kòm repons pou sanksyon britanik yo pran kont li akoz operasyon militè Moskou lanse nan Ikrèn nan. Nan fen mwa me a, responsab diplomasi ris la te anonse yo entèdi 154 manm House of Lords la (palman britanik la) antre sou tèritwa yo. Epi, nan mwa avril, Larisi te deja entèdi Premye Minis Boris Johnson ak plizyè ansyen ofisyèl britanik antre nan peyi a.
