Mwayen Oryan
Nasyonzini ap Òganize yon Konferans sou Angajman pou Sipòte Efò Imanitè Nan Yemèn
Nasyonzini sot òganize yon konferans peyi donatè sou entenèt la ant eta manm li yo mekredi 16 mas la pou ranmase pou pi piti $4.2 milyon pou finanse ane sa a efò imanitè nan Yemen ke lagè fin ravaje.
Sekretè deta Etazini, Antony Blinken anonse yè mekredi a ke Etazini ap bay Yemen preske $585 milyon nan ane 2022 a.
Inyon Ewòp la di lap bay $407 milyon 400 mil dola e Wayòm Ini promèt pou-l bay $115 milyon.
LONU di lajan sa a pral ede plis pase 17 milyon moun ki nan gwo nesesite asistans manje, yon kantite ki ka monte nan 19 milyon nan 2 zyèm mwatye ane 2022 a.
Yemen ap soufri anba boulvès depi ane 2014 lè rebèl Houthi yo ke Iran apiye te sezi kapital la, Sanaa e te dechouke gouvenman peyi a ke mond lan te rekonèt la . Yon kowalisyon Arab ke Arabi Saoudit ap dirije, ki gen ladann Emira Arab Ini, te kòmanse batay avek rebèl yo plizyè mwa apre. Lagè a te rive nan yon enpas ki lakoz plizyè dizèn milye moun nan Yemen pèdi la vi yo e te deklannche pi move kriz umanitè nan mond la,
Rebèl Houthi yo ki kontwole kèk gwo moso nan nò Yemen, yo anba akizasyon deske yo konn chache bloke livrezon asistans umanitè.
Konferans peyi donatè yo mekredi a vini nan moman anpil atansyon mond la fikse sou envazyon Larisi nan Ikrèn nan ki rive kounye a sou 21 jou. Kriz Ikrèn nan ka agrave situyasyon an nan Yemen ki konn konte sou Ikrèn pou preske yon tyè nan enpotasyon ble li.
See all News Updates of the Day
Netanyahu di Trump Envite l Washington
Premye Minis Izrayelyen an Benjamin Netanyahu di Prezidan Donald Trump envite l nan Lamezonblanch 4 Fevriye.
Se pral premye fè Netanyahu tounen premye lidè etranje ki vizit Washington anba dezyèm manda Trump la.
Netanyahu anonse plan li pou vizit la Madi.
Nouvèl la tonbe nan moman Etazini ap presire Izrayèl ak Hamas pou yo kontinye respekte seselfe ki kanpe konfli Gaza a ki dire 15 mwa.
Nan Gaza, foul Palestinyen ki te oblije kouri kite kay yo tap pran chimen difisil pou tounen lakay yo nan no a pou yon dezyèm jounen Madi. Pandansetan, seselfe frajil la toujou an plas.
Izrayèl Anonse Lanmò 8 nan Otaj yo ki Te Dwe Jwenn Liberasyon yo Nan Premye Faz Trèv la
Lendi, pòtpawòl gouvènman Izraelyen David Mencer di 8 nan otaj ki te pwograme pou jwenn liberasyon yo nan premye faz akò lapè a ant Izrayèl ak Hamas nan Gaza mouri.
Ofisyèl la te di nan yon nòt pou laprès: " Nou te enfòme fanmi yo sou sitiyasyon pwòch yo ki mouri".
Sa vle di nan 26 otaj ki gen pou retounen nan peyi yo nan premye faz akò a, se sèlman 18 ki vivan toujou.
Liban : Kout Zam lame Izrayelyen an Lakòz yon Moun Mouri nan Sid Peyi a
Ministè Sante peyi Liban fè konnen kout zam lame izrayelyen an touye yon moun epi blese sèt lòt lendi nan sid peyi a, yon jou apre yo te pwolonje trèv nan lagè ant Izrayèl ak Hezbollah a.
"Atak lènmi izrayelyen yo kont sitwayen ki t ap eseye retounen nan vilaj yo ki toujou anba okipasyon lakòz yon moun mouri epi sèt lòt blese, pami yo yon timoun," dapre sa ministè a presize nan yon kominike.
Trump Mande Jòdani, Ejipt Pran Palestinyen yo
Plizyè milye Palestinyen kanpe devan barikad pou tounen lakay yo nan nò Gaza Dimanch. Yo eksprime fristrasyon yo apre Izrayèl akize Hamas dèske li vyole ako seselfe a epi refize louvri pwen tranzit yo.
Yon jou apre dezyèm boukantay otaj Izrayelyen Hamas te kenbe nan Gaza pou prizonye Palestinyen ki te fèmen nan prizon Izrayelyen yo, blokaj la te souliyen risk ki poze pou trèv la.
Anvwaye Prezidan Donald Trump pou Mwayèn Oryan an, Steve Witkoff, pral vwayaje Izrayèl Mèkredi pou jere seselfe Gaza a, dapre sa rezo televizyon Channel 13 Izrayèl la rapote Dimanch. Nouvèl la site 2 responsab Izrayelyen.
Nan rejyon santral Gaza, plizyè kolònn moun tap tann sou wout prensipal ki ale nan nò a. Te gen machin epi pyeton, dapre sa temwen yo rapote.
Samdi Trump te pase lòd pou lame Etazini bay Izrayel bonm ki peze 2,000 liv ke predesesè li Joe Biden te pase lòd pou yo kenbe e pa livre bay Izrayèl akoz kè sote li te genyen pou enpak sa taka genyen sou popilasyon sivil Gaza a.
Premye Minis Izrayelyen Benjamin Netanyahu remèsye Trump pou "zouti li bay ke Izrayèl bezwen pou defann tèt li, konfwonte emi komen yo epi sekirize yon avni lapè ak pwosperite."
Trump te lanse apèl tou bay Ejipt ak Jodani pou yo pran lakay yo plis Palestinyen ki soti Gaza swa pwovizwaman, swa an pèmanans. Li te ajoute: "Nou ta dwe netwaye tout (teritwa a)."
Trump kontinye pou l di: "(Gaza) literalman yon lye demolisyon, prèske tout bagay ratibwaze e moun yo ap mouri lòt bò a." Li te fè deklarasyon an apre yon konvèsasyon nan telefòn ak Wa Jòdani Abdullah.
Yon responsab Hamas, gwoup militan Palestinyen ki dirije Gaza te reponn pou di li gen kè sote tou dèske yap eseye dechouke Palestinyen yo an pèmanans pou yo pa janm tounen lakay yo.
Basem Naim, yon manm biwo politik Hamas la di Reuters: Palestinyen yo "pap janm aksepte okenn òf ni solisyon, menm si (òf sa yo) sanble fèt ak bon entansyon anba degizman rekonstriksyon jan yo anonse l nan pwopozisyon Prezidan Etazini Donald Trump yo."
Anpil nan Palestinyen ki bloke dèyè barikad sou wout ki mennen nan nò Gaza rejte solisyon Trump pwopoze a tou.
Yo di: "Si li konprann li pral dechouke pèp Palestinyen an pa lafòs, eben se enposib, enposib, enpposib. Pèp Palestinyen an kwè ak tout fòs li ke tè sa se pou li li ye, se tè pa yo, se tè pa yo."
Macron Sipliye Netanyahu Pou l 'Retire Fòs li yo nan Liban'
Prezidan fransè a Emmanuel Macron Dimanch 26 janvye a te mande Premye Minis Izrayelyen an pou l "retire fòs li yo ki toujou prezan nan Liban"
Se Biwo prezidan an ki te soti nòt sila, kote yo di ke 2 lidè yo te pale nan telefòn.
Nan nòt la Palè Elysee a di:"Prezidan Repiblik la te ensiste bay Premye Minis la enpòtans pou asire ke anyen pa konpwomèt efò nouvo otorite Libanè yo fè pou retabli otorite eta a sou tout teritwa peyi yo."