Biden òdone tou deplasman twoup atè ansanm ak sipò aeryen ki soti lòt kote ann Ewòp pou mete yo pi pre fwontyè LaRisi, pandan rejyon an ap pare pou yon posib konfwontasyon.
Biden fè konnen plis twoup te pran pozisyon nan eta Balt yo pou - n-ap site - "voye yon mesaj byen klè ke Etazini, ansanm ak alye-nou-yo, pwal defann chak pous teritwa ki anba kontwòl l-OTAN."
Nan dènye deplwaman yo gen yon batayon plis pase 800 sòlda k ap soti ann Itali pou ale nan rejyon Balt la, 8 djèt konba F-35 ak 20 elikòptè Apache, k ap soti ann Almay pou ale nan peyi Balt-yo, ak 12 Apache k ap soti an Grès pou ale Polòy.
Men Biden ensiste pou-l di, "Sa yo se aksyon pou defans bò kote pa nou. Nou pa gen entansyon goumen ak LaRisi."
Administrasyon an fè konnen pi gwo zam li se sanksyon yo ki vize moun ki gen pouvwa yo nan LaRisi. Lidè ameriken an di sanksyon yo pwal anpeche gouvènman ris la "chache finansman nan loksidan," e li sèmante ke LaRisi "pwal peye yon pi gwo pri toujou, ak plis sanksyon, si fòs li yo avanse pi plis toujou" nan direksyon lwès Ikrèn.
