Etazini gen pou l anonse yon inisyativ tou nèf pandan 8èm Some Dèzamerik la kap dewoule nan vil Lima, Pewou, yon inisyativ ki vize ranfòse otonomi ekonomik fanm nan rejyon an, dapre konseye prezidansyèl Ivanka Trump.
Konseye admistrasyon an, Ivanka Trump, fè anons sa a mèkredi 11 avril anvan li pran avyon nan direksyon Prwou, kote li pral patisipe nan konferans prezidan antrepriz nan rejyon Amerik la nan kad rankont chèf deta nan emisfè a. Pitit fi Prezidan Donald Trump la di: "Bank entè-ameriken pou devlopman an fè m onè pou l envite m vin pran lapawòl nan some prezidan antrepriz zòn amerik la."Li continye pou l di, "Evènman sa a pral mete aksan sou enpòtans sa genyen lè gen pwomosyon ki fèt pou bay fanm otonomi nan amerik yo ak toupatou nan lemond atravè kowoperasyon ant sektè piblic ak sektè prive a."
Inisyativ sa a baze sou strateji sekirite nasyonal Prezidan Donald Trump te anonse nan fen ane pase a, e ki se youn nan priyorite administrasyon Etazini an. Youn nan potokwen strateji sa a, se kite fanm ak jèn yo jwi otonomi yo."
Sosyete ki bay fanm posiblite pou patisipe nan aktivite sivik ak aktivite ekonomik, se sosyete ki pi pwospè e ki pi pasifik. Madam Ivanka Trump pale pou l di, :Endepandans ekonomik medam yo, se te toujou yon priyorite enpòtan pou mwen, e kounye a, se yon priyorite pou adminstrasyon amerikèn nan. Travay sa a chaje ak enpòtans, paske lè medam yo ap jwi otonomi yo, sa kontribye nan ogmante kwasans ak stabilite zòn nan.
Nou konnen medam yo re-envesti anviwon 90 pousan nan lajan yo fè nan fanmi ak nan kominote yo, e sa debouche sou efè miltiplikasyon. Lè peyi yo fè envestisman nan fanm ak nan kominote yo, pwosperite blayi lakay yo, deklarasyon konseye prezidansyè Ivanka Trump.
Sepandan, lè medam yo ap chache mete sou pye yon antrepriz, espesyalman nan amerik latin nan, sa poze yon defi. Malgre biznis fanm kreye nan rejyon latino-amerikèn ak nan Karayib la soti nan 44 pousan an 1990 pou monte rive nan 54 pousan an 2014, kreyasyon antrepriz nan tout sektè continye mentni yon nivo ki ba, swa anviwon 12 pousan.
Fanm yo gen defi pou leve nan demach pou jwenn manman lajan, yon fason pou mete yon biznis sou pye. Sou plan mondyal, fanm yo ap fè fas ak yon defisi 300 milyon nan domèn aksè ak kredi, e sitiyasyon an pi mal nan amerik latin nan.
Apa strateji sekirte nasyonal Prezidan Donald Trump la, mwen travay tou ak plizyè ajans gouvènmantal ameriken, yon fason pou bay otonomi medam yo priyorite nan efò kap fèt sou plan nasyonal ak sou plan mondyal.
Kèk gwo responsab Lamezon Blanch, ki pa vle moun site non yo, fè konnen absans prezidan Donald Trump nan Some Dèzamerik la vin minimize enpòtans Etazini nan reyinyon sa a. Yo fè konnen, yon delegasyon gwo fonksyonè ameriken, pami yo kèk manm kabinè a ansanm Vis-prezidan Mike Pence pral reponn prezan yo menm nan somè a.