Yon salon mondyal sou tourism te dewoule sa pa gen lontan nan vil Bèlen, nan peyi Lalmay, avek patisipasyon peyi ki sou tout kontinan yo. Evennman entènasyonal sa a te atire anviwon 180000 vizitè, e pwofesyonèl nan domèn touristik la ki te prezan te pwofite pou yo fè pwomosyon pou peyi yo kòm destinasyon touristik. Pou anpil nan yo te fè sa, yo te sèvi ak tout kalite sipò pou yo chanje imaj peyi yo nan je vizitè posib yo.
Daprè Radio Métropole ki pibliye yon atik sou salon sa a, 100000 (san mil) pwomotè tourism ak 10000 (di mil) ekspozan te reponn randevou Bèlen an. Radyo a sèvi ak mo "siksè" pou l pale de patisipasyon Ayiti nan fwa mondyal sa a; kòm ilistrasyon pou bon rezilta Ayiti te anrejistre, atik la pale de anpil vizit stand ki te reprezante peyi a te resevwa pandan dewoulman salon touristik entènasyonal la.
Nan okazyon an, Minis Tourism ayisyen an, Madam Colomb Emilie Jessy Menos, te rankontre avèk prensipal aktè endistri touristik mondyal la e li te abòde avèk yo diferan estrateji peyi karayib yo itilize pou yo rantabilize domèn nan plis posib nan zòn yo a --estrateji tankou sila ki rele "fòfè destinasyon pliryèl la".
Madam Menos, daprè Radio Métropole, te patisipe tou nan divès lòt aktivite, tankou yon panèl diskisyon sou opòtinite ak defi fanm entreprenè yo ap konfwonte nan sektè touristik la, plis yon chita-pale avèk Alex Zozaya, PDG (Prezidan-Direktè-Jeneral) yon gwo gwoup otelye ki rele Apple Leisure Group.
Delegasyon Ayiti a te pwofite vizit li nan Bèlen pou l rankontre ak manm dyaspora ayisyèn nan ann Almay pou l prezante yo plan pwomosyon ministè tourism ayisyen an yon fason pou yo kapab tounen anbasadè pou peyi natal yo e pou ministè a jwenn apui yo pou efò lap fèt pou tourism lokal la ka gen plis enpòtans nan je Ayisyen kap viv a letranje yo.