Ayiti mande ofisyèlman pou otorite imigrasyon amerikèn yo akòde yon pwolongasyon 18 mwa pou yon pwogram èd imanitè anfavè sitwayen ayisyen kap viv nan peyi Etazini.
Gen plis pase 50 mil imigran ayisyen ki enskri pou Estati Pwoteksyon Tanporè (TPS) ki gen pou l fini 22 Janvye.
TPS, ke gouvènman ameriken-an te ofri apre latè te tranble an 2010 toupre kapital Ayiti a Pòtoprens, li pèmèt yo rete tanporèman ozetazini, ak dwa pou yo travay, jiskaske kondisyon-yo gen yon ale mye lakay yo.
Nan mwa Me pase a, Depatman Sekirite Teritwa Etazini te anonse l ap pwolonje TPS pou 6 mwa, olye de minimòm yon lane ke gouvènman ayisyen an ak moun kap defann enterè li te mande. Perèz pou depòtasyon te deklannche yon kouri kote pou pi piti plizyè milye imigran ayisyen te jete yo nan sezon été pase a, travèse fwontyè Kanada ilegalman pou yo chache azil nan pwovens Kebèk ki pale franse.
Lèt gouvènman ayisyen an ki mande lonje ekstansyon TPS la rive jwenn Depatman Sekirite Teritwa Etazini vandredi pase a, dapre jounal Miami Herald.
Lèt-la ke anbasadè Ayisyen ozetazini, Paul Altidor te ekri, lanse yon envitasyon bay direktè pwovizwa Sekirite Teritwa a, Elaine Duke, pou l vizite peyi a anvan administrasyon Trump la pran desizyon final li, ki ka parèt nan mwa Novanm nan.
Pandan yon vizit nan mwa Jen pase ann Ayiti, minis Sekirite Teritwa a nan moman-an John Kelly te fè konnen li panse pwoteksyon ki anpeche depòtasyon Ayisyen yo ap bout nan mwa Janvye kap vini an.
Fòk mwen ta gade kèk endikasyon sou rezon ki ta fè nou pwolonje li pou yon ti bout tan ankò apre mwa Janvye, » se sa Msye Kelly te di yon jounalis radio ayisyen ki te pataje entèvyou a ak Lavwadlamerik. Pwogram TPS la, Misye Kelly te di, "te fèt pou l fini yon jou e pa pou l dire pou tout tan."
Mesye Kelly te tounen chèf pèsonèl Mezon Blanch pou administrasyon Prezidan Donald Trump la nan finisman mwa jiyè pase a.
Ayiti se youn nan 10 peyi ke gouvènman ameriken an te chwazi pou TPS.