Semèn sa a, responsab ekonomik ameriken yo deside plase sit entènèt peyi Lachin ki pi popilè a, TOABOA/ALIBABA, sou yon lis nwa paske li se "…yon mache ki gen move repitasyon poutèt lap vann pwodui orijinal lòt peyi li imite san otorizasyon ak lòt pwovizyon ki vyole dwa pripriyete entèlektyèl…"
Ministè Afè Etranjè Lachin nan leve lavwa pou l denonse desizyon Lèzetaizini an; paske, dapre Peken, “Washington ta dwe itilize negosyasyon pou l rezoud nenpòt ki pwoblèm komèsyal.”
Sepandan, alenteryè Lachin menm, kèk obsèvatè fè konnen gouvènman chinwa a ta dwe aksepte pran plis reponsablite nan lit pou konbat vyolasyon dwa pwopriete entèlektyèl kap vale teren nan peyi a. Kòm solisyon, obsèvatè sa yo di Leta chinwa ta dwe enpoze sanksyon legal ak finansye ki pi sevè kont moun ki komèt vyolasyon sa yo.
Pwofeswè Hu Xing-Dou, kap anseye syans ekonomik nan Enstiti Teknolojik Peken an, pale ak Lavwadlamerik pou l di:
“Otorite yo dwe ranfòse pouvwa lajistis ak lapolis nan peyi isit; an menm tan tou, yo ta dwe aplike pinisyon ki pi sevè kont vyolatè yo. Toutotan moun kap fabrike kopi pwodui orijinal yo, pa fè fayit; oubyen toutotan Leta pa itilize mwayen legal pou mete yo nan prizon, afè de piratri nan domèn pwopriyete entèlektyèl la pral kontinye.”