Yon bato petwolye "Pashin" ak remokè "Nikolaï Chiker, dekore ak koulè blan, ble ak wouj, koulè drapo Larisi, te akoste nan pò Lahavàn ozalantou 8:00 nan maten lokal (12:00 GMT). Yon ti tan apre bato fregat "Almirante Gorshkov" te rive.
Fotogwaf AFP yo te wè Soumaren nikleyè "Kazan" nan lanmè a tou.
Semèn pase a Ministè Fòs Zame Revolisyonè Kiba (Minfar) te deklare "Pap gen okenn nan bato lamarin Ris ki ap gen zam nikleyè".
Yo te kontinye pou di se yon vizit ki "respekte strikteman règ entènasyonal " e ki reponn ak "relasyon amitye istorik" ant Lahavàn ak Moskou.
Pandansetan, Minis Afè Etranjè Ris la Sergei Lavrov ak tokay Kiben li a Bruno Rodriguez te rankontre nan Moskou Mèkredi, dapre sa Ministè Afè Etranjè Kiben an te di.
Nan mwad me a, Prezidan Miguel Diaz-Canel te vizite kapital Ris la kote li te asiste parad pou make viktwa Sovyetik la sou Nazi yo an 1945 ak Prezidan Vladimir Putin. Vizit sila te fèt pandan ke gouvènman ris la nan mitan gwo tansyon ak pouvwa oksidantal yo sou konfli a nan Ikrèn.
Relasyon politik ant 2 ansyen alye Lagè Fwad yo vin pi entansifye depi yon rankont ant prezidan 2 peyi yo nan Moskou nan fen ane 2022.
Vladimir Putin konsidere relasyon ak Kiba yo kom "estratejik".
Pandan dènye vizit li nan Moskou nan mwad me, lidè Kiben an te swete Larisi "siksè" nan lagè li kont Ikrèn, dapre ajans nouvel Ris Tass.
Yon flòt lamarin Ris te vizite Kiba an 2019, nan moman gwo tansyon ant Lahavàn ak Washington apre prezidan Repibliken Donald Trump (2017-2021) te vin sou pouvwa a.
Pou plis pase 6 deseni, Washington te enpoze yon anbago finansye ak komèsyal sou Kiba, ke Donald Trump te ranfòse lè li mete zile a sou lis nwa kòm peyi ki sipòte teworis.
Joe Biden, yon prezidan Demokrat, te toujou kenbe Kiba sou lis sa a epi li pa t twò modifye sanksyon yo.
Larisi tou anba sanksyon komès Lwès yo akoz lagè li ap menen kay vwazyen li ak Ikrèn.
Yon bato patwouy lamarin wayal Kanadyen an, "HMCS Margaret Brooke" tou espere rive Lahavàn vandredi nan kad 80yèm anivèsè relasyon diplomatik ant 2 peyi yo, dapre sa Ministè Afè Etranjè Kiben an rapòte.
